Launafók ber ekki ábyrgð á kreppu auðvaldsins.

 

 

Þegar menn horfðu með aðdáun á mennina sem höfðu keypt upp banka, símafyrirtæki, flugfélög og fleira og tókst einhvern veginn að búa til slíkan stórgróða að ekkert viðlíka hafði sést í þessu landi, þá varð mér að orði að þessir peningar hefðu ekki dottið ofan af himninum né heldur æxluðust þeir úr nánast engu með því að láta þá hringsóla í einhverjum hlutabréfahringekjum.

 

Einhverjir hefðu unnið fyrir þeim, einhverjir aðrir en þeir sem hefðu slegið eign sinni á þá. Kannski væru þeir reyndar ekki allir til í raun og veru, að hluta væru þeir lítið annað en tölur á einhverjum rafrænum þeytingi milli tölvukerfa fyrirtækja, banka og kauphalla, þeir væru öllu frekar táknræn auðæfi eða hugsanleg auðævi ef þau yrðu leyst út á réttum tíma. En eitthvað var raunverulegt, alla vega það sem fór í þoturnar og afmælisveislurnar eða brúðkaupsveislurnar með stórstjörnunum og hótelum í Karíbahafinu eða lúxusbíla, glæsihús, jarðir og ég veit ekki hvað.

 

Það mátti allavega ljóst vera, að þegar sýndarauðurinn raungerðist í allskyns lúxus, þá væri það auður sem einhverjir hefðu svitnað undan, eða áttu eftir að svitna undan. Og það kom í ljós þegar hrunið kom. Roskinn maður seldi einbýlishúsið, sem hann hafði komið sér upp á langri starfsævi, og keypti hlutabréf fyrir andvirðið af því að honum hafði verið talin trú um að hann mundi lifa betur af arðinum. Allt tapaðist, en hvert? Gufaði húsið upp eins og svitinn sem hafði myndast við að byggja það? Gufuðu öll þau auðævi upp, sem litlu hluthafarnir höfðu aflað sér með áralöngu striti, þegar hlutabréfin urðu verðlaus? Hvað varð um þann lífeyri sem fólk var búið að vinna fyrir og leggja í lífeyrissjóði sem nú skerðast? Hvað verður um þau raunverulegu verðmæti sem unga fólkið verður að vinna upp í framtíðinni vegna gengistapsins á námlánunum eða vaxtahækkana á íbúða- og bílalánum?

 

Var allt þetta fólk búið að sóa og sukka meðan á góðærinu stóð? Nei ætli það, það urðu ekki allir jafnvel varir við góðærið. Það voru ekki allir á sama báti meðan á góðærinu stóð. Og það verða ekki heldur allir á sama báti eftir að því er lokið.

 

Nú verða allir að standa saman, er sagt, launafólk má ekki fara offari í launakröfum, við verðum öll að taka á okkur svolitla kjaraskerðingu. Það má vera að við verðum að fara varlega um skeið til að ekki kreppi enn meir að. En það er fráleitt að tala um einhverja þjóðarsátt sem gengur út á að almenningur, venjulegt launafólk, borgi það sem aðrir sólunduðu. Launafók ber ekki ábyrgð á kreppu auðvaldsins.

Athugasemdir

[Börkur Sigurðsson (IP-tala skráð) 15.10.2008 kl. 22:00]

Það er fráleitt að tala um þjóðarsátt punktur!

Fólk verður og má aldrei verða sátt við að borga fyrir Elton John, sem keyptur var á yfirdrætti, í afmælisveislu sem þeim var ekki boðið í. Nú verða allir að standa saman segja ráðamenn sem eru ábyrgir fyrir að veita hömlulaust frelsi sem var fyrirsjáanlegt að yrði misnotað. Ég hef ekki heyrt neinn úr ríkisstjórninn tala um kjaraskerðingu í þeirra röðum, hvað þá að eftirlaunalögin verði endurskoðuð til að eiga eitthvað pínulítið upp í allar þær skuldir sem troðið var upp á okkur. Þegar Geir og félagar tala um samstöðu verða þeir að gera sér grein fyrir því að þeir eru líka hluti af þjóðinni og verða að líka að taka á sig þá kjaraskerðingu sem ætluð er okkur. Svo ég tali nú ekki um ábyrgðina sem fellur á þá.

[Jónína Þorbjörg Gunnarsdóttir (IP-tala skráð) 17.10.2008 kl. 12:11]

Mér líður nú eiginlega þannig að það er eins og það hafi verið brotist inn í nánast hvert einasta heimili á Íslandi á meðan við vorum í vinnunni og öllu stolið sem hægt var að stela og þar á meðal ærunni okkar sem mér finnst nú kannski sárast af öllu. Það er hægt að eignast vinnu, heimili og bíl aftur en æruna munum við verða lengi að endurvinna. En það er merkilegt hvað við höfum sofið fast eða verið lengi í vinnunni og ekki tekið eftir því þegar innbrotin voru framin. Það þýðir ekkert að reyna að forðast sorgarferlið við erum öll sem þjóð í bullandi sorgarferli.

[Big Mama (IP-tala skráð) 17.10.2008 kl. 14:53]

Alveg innilega sammála þessu.