Góðærinu er ekki lokið

birtist einnig á ogmundur.is

 

- af því að það var ekkert góðæri. Góðæri er þegar vel árar þannig að hægt er, vegna veðurfars eða annarra náttúrulegra skilyrða, að afla vel, hvort sem er til sjávar eða sveita, án þess að ganga á auðlindina. Og skynsamir menn leggja þá fyrir til mögru áranna.

 

Hið svokallaða góðæri undanfarinna ára var blekking. Það var ekkert til að leggja fyrir. Það byggðist ekki á meiri fiskafla, meiri uppskeru til sveita eða meiri framleiðslu í verksmiðjum. Okkur var sagt að það væri verið að skapa auð, en þessi auður var ekkert annað en síhækkandi tölur sem hringsóluðu á rafrænan hátt milli tölvukerfa banka og fjármálafyrirtækja. Og þó urðu þessar tölur að auði í höndum útvalinna manna í lykilstöðum. En þessi auður var ekki nýr auður, hann kom ekki úr neinni framleiðslu og því síður af himnum ofan. Hann var sjálftekið lán og reyndar þýfi.

 

Það hlaut að koma að skuldadögum. Og nú skulu þeir borga sem minnst nutu blekkingarinnar, sem ekki eyddu um efni fram, heldur unnu sína vinnu af samviskusemi og heiðarleika. Og unglingarnir og börnin, vinnuafl framtíðarinnar.

 

Góðærið var þjófnaður. Á árum áður var notað orðið arðrán, sem þýðir að arðinum af vinnu almennings er rænt. Það er það sem gerðist.

 

Hefur eitthvað tapast? Engin hús hafa brunnið í eldsvoðum eða hrunið í jarðskjálftum. Enginn hefur sett jarðskálftana í sumar í samhengi við það sem nú dynur yfir. Eldgos hafa ekki lagt lönd í eyði. Það hefur ekki orðið uppskerubrestur eða aflabrestur, engin snjóflóð hafa eyðilagt mannvirki og langt er liðið frá meiriháttar skipsskaða. Ekkert hefur eyðilagst. En margir hafa tapað þótt ekkert hafi brunnið, hrunið eða sokkið.

 

Það er jafnrangt að líkja kreppunni við náttúruhamfarir og kalla undanfarandi tímabil góðæri. Kreppa er í raun skuldadagar, þegar skuldum braskaranna og arðræningjanna er velt yfir á alþýðuna. Í kreppunni nær arðránið hámarki, þá er farið í vasa almennings og arðinum af vinnu hans stolið til að borga sýndargróða undanfarinna ára, sem var í raun fyrirfram nýttur ránsfengur. Hið svokallaða góðæri og kreppan eru í raun tvö stig í arðránsferlinu.

 

Kreppur eru ekki náttúruhamfarir. Þær eru kannski óhjákvæmilegur fylgifiskur kapítalismans. En kapítalisminn er ekki náttúruafl, hann er samfélagskerfi og samfélagskerfum er hægt að breyta eða bylta.

 

 

Athugasemdir

[Óskar Helgi Helgason (IP-tala skráð) 6.11.2008 kl. 01:11]

Heill og sæll; Einar !

Þakka þér; skilvísa og skorinyrta grein, hér að ofan.

Hver segir svo; að við þjóðernissinnar, og þið sósíalistar, getum ekki verið sammála, þá sóðaskapur frjálshyggjukapítalistanna, nístir merg og bein, hrekklauss og heiðarlegs fólks ? 

Með beztu kveðjum, úr Árnesþingi /

Óskar Helgi Helgason 

[María Kristjánsdóttir, 6.11.2008 kl. 01:13]

Spurningin er bara hvort þjóðin í kreppu verður svo lánsöm að geta breytt reiði sinni í eitthvað skapandi - nýtt lyðræðislegt samfélag. Eða hvort sjálftökuliðið kemst aftur inn bakdyramegin.

[Bjarkey (IP-tala skráð) 6.11.2008 kl. 13:18]

Tek undir greinin er góð og mesti óttinn núna er einmitt eins og María segir að sjálftökuliðið sölsi allt undir sig aftur.

[Haukur Baukur, 6.11.2008 kl. 15:22]

Snilld snilld og kærar þakkir fyrir góða grein.

 Eins og berlega kemur í ljós höfum við það ekki slæmt.  Okkur er aðeins talin trú um annað.  Hrekkt í flækjur fjármála og spillingar.

Alþingi og stjórnvöld eru aðeins umboðsmenn okkar, og þeim má skipta út

Burt með spillinguna!!! 

[Einar Ólafsson, 7.11.2008 kl. 11:16]

Eftir að ég setti þessa grein á netið fékk ég senda þessa slóð:

http://www.youtube.com/watch?v=9ejCZTYZPpQ

Nú þori ég ekki að ábyrgjast að allt sé rétt sem þar kemur fram, en hef heldur enga ástæðu til að rengja það. En ef rétt er, þá skýrir það svolítið þetta með að góðærið hafi verið blekking. 

[Guðmundur Brynjólfsson (IP-tala skráð) 12.11.2008 kl. 09:34]

Allt satt og rétt Einar. Það er ekkert góðæri þó svo að til séu tertur á stöku bæjum.